శ్రీపంచమి

పదమున్భాసిలు నర్థమున్నిలుపగా, ప్రాశస్తమౌ విద్యతో,
చదువున్మిన్నగ నెంచి,నిన్గొలుచు సత్సంగమ్మునన్, శారదే!
మది నీ రూపము నిల్పి వందనములంబల్కంగ, ప్రేమమ్ముతో
సదసద్భేదము తెల్పి, సార్థకముగా జన్మంబు సేయంగదే!

- లక్ష్మీదేవి

మత్తేభవిక్రీడితము

దీపం

 గాలి తగిలినంత ఘడియ నిలువలేదు

దేహధారి యుంచు దీపమొకటి

గాలి తగులకున్న ఘడియ నిలువలేదు

దేవుడుంచినట్టి దీపమొకటి

/(దేహమందు వెలుగు దీపమొకటి)

-- లక్ష్మీదేవి

ఆటవెలది

తల్లీ!

 

తల్లీ శారద! సత్య తత్త్వమున నిత్యానంద సంధాత్రివై,

యుల్లాసమ్మను రథ్యమార్గమున సంయోగమ్ము లక్ష్యమ్ముగా

కల్లోలమ్ముల లోకరీతులను నిష్కాసించు తత్వమ్ముతో

ముల్లోకమ్ములఁ గాచుకొమ్మనుచు నే మ్రొక్కంగ దీవింపవే.

 

- లక్ష్మీదేవి

శార్దూలవిక్రీడితము

నాథా!

 అరాచకమ్ము పెచ్చుమీరి హాని చేయుచున్న యీ 

కరాళదంష్ట్ర భీకరంపు కాలరూప లోకమున్ 

నిరాళమైన ప్రేమతోడ నిర్వహించు నాథుకై 

విరాళితోడ వేచియుందు వేదనమ్ము నీఁగగా.

#లక్ష్మీదేవి 

పంచచామరము

హ్మ్ హ్మ్

 ఆశ్చర్యమ్మున నొక్కెడ 

నిశ్చేష్టితనై జగత్తు నిష్ఠుర వాక్కుల్, 

దుశ్చర్యలనుం జూచితి 

పశ్చాత్తప్తగ రగిలితి పార్థివ జనుమన్. 

- లక్ష్మీదేవి 

కందము 

కాలం!

నీలపు రాత్రులంబొదిగి స్నిగ్ధసువర్ణ దినాళులందు ను
న్మీలిత నేత్ర! నిభ్భువిని మేలిమి యన్నులమిన్నఁ జేసి, మ
మ్మేలితి! చిత్రమేమనగ హృద్యమ ప్రాకృత దృశ్యవీక్షణా
లాలసఁగోలుపోయినది లౌకికజీవనమేమి కాలమో!

-- లక్ష్మీదేవి

చంపకమాల

 

విజయదశమి

జీవనమునఁ గలిమియు బలిమియునిడి సేమములనుఁ గరుణనొసగు నీ
పావనమగు నిజ ముగమునుఁ గనఁగల భాగ్యములను నడిగెద, మది నీ
కోవెలవలె నిలుపగఁ దగు గుణములఁ గోరెద, జగములు నిరతము నీ
దీవనలను సుఖముగ మనఁగలుగుట దీక్షనుఁ గొని నడిగెద హిమజా!  

వెన్నెల లలిగా పేరుచు, రే జిప్పిలు నిరులనుఁ జూపెడి వెలుగులలో
పున్నెపు సిరిగా నేలిన దైవమ్మును శరణని, శేముషి నిడుమని నే
విన్నపమిడగా దీవనగా దిగ్విజయ పథముఁ బంపెడి జననివి, ని
న్నెన్నడు విధిగాఁ గొల్చెదనమ్మా! యినుమడిగను రేయిని పగళులలో.

- లక్ష్మీదేవి

లాక్షణీ వృత్తము

విజయ వృత్తము 

లక్ష్మీ

 సిరులనునివ్వంగల దేవీ! చిరుచిరునగవుల సిరులీవే!
మురిపెముతోఁగోరెద, నీ పావన ముఖదరిసెనములనిమ్మా!
తరుణిని నన్నీ భువినిన్వీడక, తప జపములఁ గొనరావే!
వరముల నేఁ గోరను, లక్ష్మీ! ననుఁ బదములకడ  నిలుపమ్మా!

 

-- లక్ష్మీదేవి

లక్ష్మీ వృత్తము

 

స్రక్

 కొలువై నీవుండుతావున్కొరత కలుగునే కోమలాంగీ! వరాంగీ!
పలుకే తాఁదొల్కుఁ దేనెల్వఱదఁగొనఁగ శర్వాణి! చిచ్ఛ్యామలాంగీ!
తలతున్నిన్నెందు నన్ నీదరినిఁ గొనుము కాదంబినీ! మంగళాంగీ!
చెలిమిన్పాడంగనిమ్మా, చిలుకపలుకులన్శీతపుత్రీ శుభాంగీ !

 

-- లక్ష్మీదేవి

మహాస్రగ్ధర

 

జ్ఞాన

 అమ్మా! చదువుల తల్లివి, యక్షరమిడుమమ్మా!

మమ్మాదరమునఁ జేరిచి మక్కువఁ గనుమమ్మా!

యిమ్మా వినయము, గర్వము నీఁగగ విడుమమ్మా!

యిమ్మానసమను పద్మము నింపుగఁ గొనుమమ్మా!

- లక్ష్మీదేవి

జ్ఞాన వృత్తము

వందనము

 ఫణమూను సర్పముల వోలె భాసిలగ, భీకరాకృతులతో
రణచండివై కదలి, క్రూర రక్కసుల మత్సరమ్మడచు మా
రణహోమ గాథలనుఁ గూర్చి రంజిలగ, దేవి భాగవతము
న్మణిమాలగా పెనఁచు నాటి మౌనులకు వందనంబనియెదన్.

 

- లక్ష్మీదేవి

మణిమాల 

లక్ష్మిదేవి

 

అనయము పాదసేవలకునంకితమైన సతీమతల్లివై,

ఘనుడగు దైవమైన హరిఁ గట్టిన పత్నివి, లక్ష్మిదేవివై,

ధనములు ధాన్యరాశులును ధాత్రి జనాళికినిచ్చు రాజ్ఞివై,

ననుఁగనుచుందువంచు మది నమ్మితినమ్మ సుధాంశుసోదరీ!

 

ఆకలైన నాశలైన నంతులేని స్వార్థమైన

లోకధర్మమంత నీ విలోకనమ్ముఁ గోరునమ్మ

శోకమెల్ల బాపునట్టి చూపుయొక్కటైన చాలు

మ్రోకరిల్ల రక్షసేసి పూజలందు దైవమీవు

-- లక్ష్మీదేవి

చంపకమాల, చంచల

ఆశ తీరదు

 తెలుపునఁ దేలు మరాళముపైని సతీ సరస్వతి రూపముం
దలచి యొకింత విశేషపు భంగిఁ బదమ్ముఁ బాడగనెంచితీ
యలసట తక్క కృతార్థత కల్గక యాశతీరదు, శుద్ధమౌ
లలిత పదాళిని ధారనొసంగు విలాసమెన్నడు జూపెదో!

 

-- లక్ష్మీదేవి.

వనమంజరి 

సరస్వతీ!

 కంటికి కానరాదెచట, గంధము దాచుట క్లిష్టమౌ, సదా
కంటకఛేదియై యొనరు, గౌరవమెప్పుడు వృద్ధిఁజేయు, తా
వెంటను వచ్చునెన్నటికి, ప్రీతినిఁ బంచిన హెచ్చు, నట్టి సొ
త్తంటి సువిద్యనిత్తువని తల్లి సరస్వతి! నిన్ను చేరుదున్.

 

-- లక్ష్మీదేవి.

ఉత్పలమాల 

సద్యోజాత

 తల్లీ! దండములమ్మ ! నవ్యనవనీతంబైన సింగారమై
కల్లోలంబుల పాల సంద్రమున, బంగారంపు పూబంతివై
యుల్లాసమ్ముగ నేల గర్భమున, సద్యోజాత సన్మూర్తివై
ఫుల్లాబ్జాక్షి జనించి, శ్రీహరిని సమ్మోహించి చేబట్టితే!

 

-- లక్ష్మీదేవి.

శార్దూలవిక్రీడితము

 

మనోజ్ఞ

 కమలమవై విలసిల్లి కాంతుని సేవకై

భ్రమరమువై తపియించి బాధలకోర్చు నీ

సమమెవరే సిరిదేవి, చంద్రుని సోదరీ!

సుమములతో కయిమోడ్తు, జోతలఁగొనుమా!

 

-- లక్ష్మీదేవి.

మనోజ్ఞవృత్తము 

పెంజీకటి

 పరిచయమైన రూపు, పసిపాపనుఁ బోలిన నవ్వు, చల్లనై
విరిసిన కంటిచూపు, కడు భీతినిఁ బారగఁ ద్రోలు శౌర్యముం,
దరగని కాంతితోపు ముఖదర్శనమెల్లను వీడి, జ్ఞానియై
చిరు దరహాస ముద్రఁ బెనుఁ జీకటికవ్వలి కాంతిఁ దల్చుటో!!

 

-- లక్ష్మీదేవి.

ఉత్పలమాల

 

దిక్కెవ్వరో!

 మోహావేశముతో భ్రమించి జగతిన్మూర్ఖమ్ముగా నమ్ముచున్
బాహాటమ్ముగ నేఱరానివగు దుర్వారంపు లోకుట్రలన్
దేహాత్మల్ బలియైన వేళ నకటా! దిక్కెవ్వరో స్వామి! నీ
సాహాయ్యమ్మునుఁ గాక నాకు, కలదా సందేహమింతైననున్.

-లక్ష్మీదేవి

శార్దూలవిక్రీడితము

ద్వ్యా

 సద్వ్యాసంగములందు నుండగల యిచ్ఛాశక్తి సంకల్పమున్,

సద్వ్యూహమ్ములతోడ యత్నమును,సంస్కారంపుసంసర్గమున్

హృద్వ్యాధ్యాదులనుండి రక్షనిడు నే యే ప్రాయమందైన, నీ

షద్వ్యంగమ్మును లేదు, సత్యమిది విశ్వాసమ్ము నీవుంచుమా.

- లక్ష్మీదేవి

శార్దూలవిక్రీడితము

ద్వ్యా ప్రాస

వినాయకా

 ఏనుగుమోమునేర్పడగ నిమ్మడి శోభల మూర్తి పూజకై 

జానుతెనుంగు పద్యములఁ జక్కగఁ బాడు నొకింత నేర్పుకై 

యేను వినమ్రతన్నిలుతు నియ్యెడ స్వామి వినాయకా! వెస

న్కానుకఁ, గోరు చందమున కైగొన నిచ్చి యనుగ్రహింపుమా!

-లక్ష్మీదేవి 

ఉత్పలమాల